Giandoja

Giandoja a Callianet a l’è pi nen tornà
sua casota en ponta an bric abandonà
la stala vojda , an sel trabià tante ragnà.
Anche la crota ‘na vòta sèmper soagnà
a moir con le vassele mufie e anternasà.
Che ricord le noit ed ciuca le noit ed vià!
Giandoja a l’è calà vers la sità tanti ani fà
con el birocin, Giacometta e soe tre masnà.
A l’ha dovù lassé i so bei vestì da buratin
per un giacon ed pel, ‘na borsa ‘n barachin.
A l’ha molà la sapa, la brinda e el verdaram.
A l’ha desprendù a massé el crin a fesse l pan
a bate el gran a desbrojé da sol vache e bocin.
A l’ha fitase un brut apartament con l’ascenseur.
Giacometta al supermarket a vend ij alimentar.
I cit fan già le scole aute e parlo mac pì tricolor.
Giandoja a Callianet a l’è pi nen tornà.
I buratin son quasi tui partì per le sità. 

Claudio Raineri