23
avrì 1796
Vers la fen del set-sent,
al galòp, a j'è rivà
an sla piassa del castel
d'is pais astesan
in messagè da lontan;
chiel da Bològna al rivava
e na notissia grama al portava.
Col messagè che galopand
l'era rivà a Castealfè,
el sircava ij parant
d'in certo De Rolandis Gioan Batista,
che a Bològna l'a studiava.
E quand ij parant a l'ha 'ncontrà,
sa neuva l'è giraja cà per cà:
col bardòt pan-a spiparà
da què trei meis al sarja sta ampìcà.
So mari a sa notissia l'è svenia
so pari pì robust l'ha vorsì savai
el pirchè el sò bardòt vorivo ampichè.
Col messagè riverant
l'ha spiegaie a sa geant
che el so' fieu l'ava ancomansà
na rivolussion
ant cola sità, che dal papa l'era comandà.
Coj giovnòt ch'i-avo vint-ani
per conzissi tra 'd lor a-i avo anche ideà
na cocarda 'd trai color
Rossa paj del feu, Bianca paj d'la fiòca
Vërda paj d'la speransa e d'erba dij nòcc prà.
E paraj cola maten,
quand el so' l'era ancora nan spontà,
ant cola sità lontan,
an sla forca a l'è sta ampicà
l'ava vintun-ani pan-a compì
e el bòia col dì na fio a l'ha facc scompari.
L'è paraj che el nost tricolor a l'è nascì
per la volontà ad col masnà
che a cherdivo ò savo nan
che chi el veul giustissia, pas e speransi
semp s'ambat con di cagnass
semp as treuva tra ij pè
coj che dla giustissia a meno fan.
Ma col boia l'ha nan pensà
che 'npicanda coj giovnòt
ina miccia l'avrja 'nviscà.
Cola sità
col paìs
poch per vota as son svijà,
na rivolta a l'è comensà
e l'Italia a j'han formà.
Per coj fijeu che sa cocarda
ant el cheur a j'han portà
per s'ideal 'd libertà
....la sò pel a j'han lassà.
Noiacc, sò diret disendant,
col 23 d'avrì 'd tersant-ani fa
a j'oma el dover 'd ricordè,
e con speranssa tramandè.
|