|
Passarot
Spasgianda per sa campagna
a m'anbat ant in biscon
ad bòssore d'aroej e d'sangoanin;
e lì an mes a tute se spin-e
scòrz a volè in passarotin.
Nojacc ch'a sima abitoà a tute se comodità
a-i oma forse mai pensà
se a dovijsso vive ant is condission
an certe stagion,
come as sarìo za lamentà?
Col passaròt da mi sbarivà
anvece al canta come na masnà,
el saota tut content
'n sima a cole spin-e
dondolajè dal vent.
El sò cant a smija in ringrassiament
l'è certament na bela canson,
cantaja al creator
per la sò condission.
Noiacc ch'a sima sicurament pù
privilegià,
ma sa canson sima nan bon a cantà
tuti i di a-i lajsoma per lamentà
per ad cose ch'a m'han nen dà,
o per cose ch'a j oma s-ghierà.
Col passaròt che el canta content
am ricorda ad cose veje,
quand a-i avo così poch,
però el nost cheur el cantava content,
e la gioventù a volava con el vent.
Per in moment a-i heu pensà
che quand la me ora a la rivrà
voria anche mi vni come col passaròt,
essi buon a cantè con tuta la me devussion
cola canson ch'a l'è tuta in amor,
in amor per la vita passà
per tut lònn ch'a-i heu provà
per tut lònn ch'a- avreu lassà,
e che ad mi el mond el dirà.
Forse a v'a smija che mi ciama pooch:
podej volè an sima s'aspin-i,
an sima a si fio,
vanda el me spirit an gioventù
el gigava con na rama 'd sanguanen
antarsiaja con in cotlen.
Is passaròt adess a- o smija ancora pì content
e con in cit vol ant in pra a l'è volà;
sempi el canta tut content
pirchè a l'ha capì che la so condission
a l'è 'nvidiaja da mi,
pirchè a l'ha capì che mi ancheu a-i heu capì
che ant is mond mach con tant ringrassiament
el cheur al viv content.
|
